Eph 3 | KhmKCB | STEP | ហេតុ នេះ ហើយ ខ្ញុំ ប៉ូល ជា អ្នកទោស ដោយព្រោះព្រះ គ្រិស្ដ យេស៊ូ សម្រាប់ អ្នករាល់គ្នា ដែល ជា សាសន៍ដទៃ

Ephesians 3

1 ហេតុនេះហើយខ្ញុំប៉ូលជាអ្នកទោសដោយព្រោះព្រះគ្រិស្ដយេស៊ូសម្រាប់អ្នករាល់គ្នាដែលជាសាសន៍ដទៃ 2 អ្នករាល់គ្នាពិតជាបានឮហើយអំពីតួនាទីមើលការខុសត្រូវដែលជាព្រះគុណរបស់ព្រះជាម្ចាស់បានប្រទានមកឲ្យខ្ញុំសម្រាប់អ្នករាល់គ្នា 3 គឺព្រះអង្គបានបង្ហាញឲ្យខ្ញុំស្គាល់អាថ៌កំបាំងតាមរយៈការបើកសំដែងដូចដែលខ្ញុំបានសរសេរដោយសង្ខេបរួចហើយ 4 កាលអ្នករាល់គ្នាអានសេចក្ដីនោះអ្នករាល់គ្នាអាចយល់បានអំពីចំណេះរបស់ខ្ញុំចំពោះអាថ៌កំបាំងរបស់ព្រះគ្រិស្ដ 5 ដែលមិនបានបង្ហាញឲ្យកូនចៅមនុស្សជំនាន់មុនៗស្គាល់ដូចដែលបានបើកសំដែងដល់ពួកសាវកនិងពួកអ្នកនាំព្រះបន្ទូលដ៏បរិសុទ្ធរបស់ព្រះអង្គនាពេលបច្ចុប្បន្ននេះតាមរយៈព្រះវិញ្ញាណឡើយ។ 6 តាមរយៈដំណឹងល្អពួកសាសន៍ដទៃត្រលប់ជាអ្នករួមស្នងមរតកជាអ្នករួមក្នុងរូបកាយតែមួយហើយជាអ្នករួមចំណែកសេចក្ដីសន្យានៅក្នុងព្រះគ្រិស្ដយេស៊ូ 7 ហើយខ្ញុំបានត្រលប់ជាអ្នកបម្រើដំណឹងល្អនេះតាមរយៈអំណោយទានជាព្រះគុណរបស់ព្រះជាម្ចាស់ដែលបានប្រទានឲ្យខ្ញុំស្របទៅតាមអំណាចដ៏មានអានុភាពរបស់ព្រះអង្គ។ 8 ព្រះអង្គបានប្រទានព្រះគុណនេះឲ្យខ្ញុំដែលជាអ្នកតូចតាចបំផុតនៅក្នុងចំណោមពួកបរិសុទ្ធទាំងអស់ដើម្បីឲ្យខ្ញុំប្រកាសដំណឹងល្អប្រាប់ពួកសាសន៍ដទៃអំពីភាពបរិបូររបស់ព្រះគ្រិស្ដដែលវាស់ស្ទង់មិនបាន 9 និងឲ្យបំភ្លឺដល់មនុស្សទាំងអស់អំពីអ្វីដែលជាគម្រោងការអាថ៌កំបាំងដែលបានលាក់ទុកតាំងពីអស់កល្បនៅក្នុងព្រះជាម្ចាស់ជាព្រះដែលបានបង្កើតអ្វីៗទាំងអស់ 10 ដើម្បីបង្ហាញឲ្យការគ្រប់គ្រងនិងសិទ្ធិអំណាចទាំងឡាយដែលនៅស្ថានសួគ៌ស្គាល់ប្រាជ្ញារបស់ព្រះជាម្ចាស់ដែលមានជាច្រើនយ៉ាងនៅពេលនេះតាមរយៈក្រុមជំនុំ 11 ស្របទៅតាមគម្រោងការដ៏អស់កល្បដែលព្រះអង្គធ្វើនៅក្នុងព្រះគ្រិស្ដយេស៊ូដែលជាព្រះអម្ចាស់នៃយើង។ 12 នៅក្នុងព្រះអង្គយើងមានសេចក្ដីក្លាហាននិងមានផ្លូវទៅព្រះជាម្ចាស់ដោយការទុកចិត្ដតាមរយៈជំនឿលើព្រះអង្គ។ 13 ដូច្នេះសូមអ្នករាល់គ្នាកុំរសាយចិត្ដដោយព្រោះតែសេចក្ដីវេទនារបស់ខ្ញុំសម្រាប់អ្នករាល់គ្នានេះឡើយដ្បិតគឺជាសេចក្ដីរុងរឿងរបស់អ្នករាល់គ្នាទេ។ 14 ហេតុនោះហើយបានជាខ្ញុំលុតជង្គង់នៅចំពោះមុខព្រះវរបិតា 15 ដែលគ្រួសារទាំងអស់ទាំងនៅស្ថានសួគ៌និងផែនដីមានឈ្មោះមកពីព្រះអង្គ 16 សូមឲ្យព្រះអង្គប្រទានឲ្យមនុស្សខាងក្នុងរបស់អ្នករាល់គ្នារឹងមាំឡើងដោយសារអំណាចតាមរយៈវិញ្ញាណរបស់ព្រះអង្គស្របទៅតាមភាពបរិបូរនៃសិរីរុងរឿងរបស់ព្រះអង្គ 17 ដើម្បីឲ្យព្រះគ្រិស្ដគង់នៅក្នុងចិត្ដរបស់អ្នករាល់គ្នាតាមរយៈជំនឿហើយសូមឲ្យអ្នករាល់គ្នាដែលត្រូវបានចាក់ឫសនិងចាក់គ្រឹះនៅក្នុងសេចក្ដីស្រលាញ់ 18 អាចយល់ច្បាស់ជាមួយពួកបរិសុទ្ធទាំងអស់អំពីទទឹងបណ្ដោយជម្រៅនិងកម្ពស់ 19 ព្រមទាំងស្គាល់សេចក្ដីស្រលាញ់របស់ព្រះគ្រិស្ដដែលហួសពីការយល់ដឹងដើម្បីឲ្យអ្នករាល់គ្នាបានពេញរហូតដល់គ្រប់ទាំងសេចក្ដីពោរពេញរបស់ព្រះជាម្ចាស់។ 20 សូមឲ្យព្រះអង្គដែលអាចធ្វើលើសលប់ហួលពីសេចក្ដីទាំងឡាយដែលយើងសុំឬគិតស្របតាមអំណាចដែលកំពុងធ្វើការនៅក្នុងយើង 21 បានប្រកបដោយសិរីរុងរឿងនៅក្នុងក្រុមជំនុំនិងនៅក្នុងព្រះគ្រិស្ដយេស៊ូគ្រប់ជំនាន់អស់កល្បជានិច្ចអាម៉ែន។